JIMENA GARCÍA GAÑA O TORNEO DE NADAL DE SAN BLAS

 A nosa deportistas participou esta fin de semana no tradicional torneo de nadal que organiza o Club San Blas de Madrid. Jimena gañou a todas as rivais en 3 enfrontamentos acadando o primeiro posto en menos de 65 kg U13. 

Despois do torneo loitadoras de toda España permanecerán concentradas durante dous días cos diferentes equipos nacionais.

Jimena este ano acadou o título de Campiona de España U13 e agardamos que para o 2025 poda revalidalo na categoría U15 xunto a varios dos seus compañeiros de club.

TORNEO NACIONAL DE BARAKALDO- MAIDER UNDA

Esta fin de semana viaxamos a terras vascas para participar nun dos torneos de maior nivel nacional para as categorías base. Ate Barakaldo, e convocados pola Selección Galega, desprazáronse algúns das nosas xóvenes promesas da categoría U13. Trátase de Jimena García que acadou o ouro, Héctor Somoza que regresou coa prata e Kike Seoane que rematou nun meritorio 4º posto en menos de 70 kg. Todos eles xa participaron esta tempada nos Campionatos de España e este torneo supuxo unha magnífica oportunidade de prepración para próxima tempada 2025 na que xa loitarán na categoría U15. Tamén tiveron ocasión de coñecer á bronce olímpica Maider Unda, sen dúbida unha expericia motivadora para os nosos deportistas.

FINALIZAMOS AS ACTIVIDADES DO PLAN CORRESPONSABLES

 Esta semana finalizamos as xornadas deportivas do Plan Corresponables que permitiron que máis de de 60 nenas e nenos entre os 6 e os 16 anos coñecesen este deporte entre os meses de xullo e novembro.

Unha boa iniciativa que axuda a dar visibilidade ás actividades deportivas como alternativa de ocio para a mocidade.

II MEMORIAL ALEXANDER KATCHELAEV

 Onte celebrouse no Pavillón do CGTD de Pontevedra a segunda edición do torneo en memoria do adestrador Alexander Katchelaev e ate a cidade do Lérez desprazámonos con 3 das nosas novas promesas Kevin Cuba, Jairo Mosteiro na categoría U17 e Xiao Seoane na categoría sénior.

Kevin acadou o ouro en menos de 110 kg mentres que Jairo acadou unha meritoria prata en 65 kg. Pola súa banda,  Xiao tamén acadou a prata en 65 kg.

Estes torneos son importantes no inicio da tempada para a formación dos nosos deportistas que aspiran a participar no 2025 nos campionatos de España das súas categorías.

TORNEO INTERNACIONAL VILLA DE MADRID

 

Varios dos nosos deportistas loitaron esta fin de semana no Torneo Villa de Madrid que reuniu a máis de 400 deportista na capital.

Esta é a primeira competición da tempada e sirvenos para valorar o estado de forma dos nosos deportistas neste inicio de curso.

Na competición disputáronse diferentes categorías, dende U13  a U23 e congregou a deportistas do Estado  xunto a unha forte presenza de loitadores e loitadoras estranxeiros.

Dos nosos deportistas, convocodos coa selección galega temos que destacar a :

Na categoría U13:

• Enrique Seoane (Campión en menos de 70kg).
• Hèctor Somoza (5⁰ en menos de 55 Kg; non puido acabar a competición por molestias).
• Bruno Pintos do Lugo Loita Olímpica (9⁰ en menos de 45 kg).
• Jimena García (5ª en emnos de 65 kg).

E en U23:

• Xiao Seoane (8⁰ en menos de 65 kg).

Todos estes deportistas disputaron este ano diferentes campionatos de España.

CATRIEL PEHUÉN ESCOLLIDO MELLOR DEPORTISTA DE LOITA NOS PREMIOS DO PROGRESO

 

O pasado xoves 24 tivo lugar no Hotel Méndez Núñez a gala do Deporte Lucense organizada polo xornal El Progreso e no que se escollen aos mellores deportistas de varias modalidades.

Catriel Pehuén foi o galardoado na modalidade de loitas olímpica seguido de Kevin Cuba, tamén loitador da nosa escola e que xa fora galardoado na pasada semana.

O loitador de orixe arxentino recibiu o premio da man da Subdelegada do Goberno María Isabel Rodríguez López, e entre os méritos para a súa candidatura foron os Ouros nos Campionatos Galegos Absolutos e a prata nos Campionatos de España Sénior. 

DOUS BRONCES NOS CAMPIONATOS DE ESPAÑA SENIOR

 

Esta fin de semana celebráronse en Santigo os campionatos de España Sénior de loitas olímpicas, e foron varios os loitadores vilalbeses que se desprazaron ao Pavillón de Santa Isabel para representar a Galicia.

Destacaron Catriel Pehuén en menos de 125 kg que gañou 3 combates tendo que retirarse en semifinais no pase á final por molestias no cóbado, aínda así acadou o bronce para o equipo galego.

Ramón Monasterio tamén acadou un prezado bronce para Galicia en menos de 97 kg. Finaliza así unha magnífica tempada na que retomou a competición dende a pandemia.

A outra participación vilalbesa veu da man de Xiao Seoane en menos de 65 kg que sendo aínda júnior participou por primeira vez nun Campionato de España facendoo nada máis e nada menos que na categoría sénior, onde acadou o 10º posto.

A Santiago non puideron asistir José Cuba nin Carlos Yobani por lesión deixando a Galicia sen Ouros en libre olímpica nesta edición. Os únicos Ouros para o combinado galego acadáronse en Libre Feminina da man de Lydia Pérez (Pontevedra) e Nerea Pampín (Keltoi de Vila de Cruces).

CAMPIÓNS DA LIGA DE DEPORTE BASE

 

Por terceiro ano consecutivo a nosa escola acada o primeiro posto na Liga Galega de Deporte Base na Xornada Final que se celebrou este sábado no Pavillón do Restollal en Santiago de Compostela.

A nosa escola clasificárase previamente na Xornada Norte do mes de abril da que saíron os 3 equipos que, xunto aos mellores equipos da Xornada Sur, conformaron os 6 equipos desta Final A na que se enfrontan entre todos nunha volta.

Esta actividade prima a participación sobre o compoñente únicamente competitivo con equipos mixtos de entre 6 e 13 anos limitándose as técnicas permitidas para adaptarse a todos os niveis e idades.

Esta liga é unha maneira interesante de que os e as xóvenes deportistas podan poñer a proba o aprendido durante a tempada e iniciarse de maneira lúdica na competición. 

Para o nós, o resultado e a clasificación na liga son cousas secundarias, parecéndonos moi positivo o feito de que fósemos a escola máis numerosa. È de agradecer o compromiso das nenas, os nenos e as súas familias coa actividade, que fixeron un oco na axenda nunhas datas tan compricadas polas diversas celebracións e finais doutras modalidades deportivas. Hai que ter en conta que nos equipos máis numerosos moitos e moitas deportistas so disputan un enfrontamento e algúns se limitan a facer combates de exhibición, e aínda así todos colaboran pasando unha mañá de sábado apoiando e puntuando para que a nosa escola repita outro ano máis como mellor escola de deporte base.

VARIOS VILALBESES NO VILLA DE GIJÓN

Galicia acaba de proclamarse campiona por equipos no tradicional Torneo Villa de Gijón organizado polo Grupo Covadonga. Entre o combinado galego destacaron varios dos nosos deportistas como Kevin Cuba que se fixo coa prata, igual que Héctor Somoza que acadou o mesmo metal.

Pola súa banda Xiao Seoane e Jairo Mosterio conformáronse co 4º e 7º postos respectivamente.

CUBA NON LOGRA A CLASIFICACIÓN OLÍMPICA EN ESTAMBUL

 

O noso deportista máis internacional non logrou clasificarse no Preolímpico Muncial de Estambul esta fin de semana ao caer ante o medallista europeo e mundial o polaco Robert Baran.

Cuba acudía á capital turca como derradeira oportunidade para poder estar nos Xogos de Paris 2024 despois dunha tempada de incertidume polas molestias e lesións recurrentes. 

A pesares de ser o seu cuarto ciclo olímpico, o vialalbés afrontaba o desafío coa ilusión e nervos dun novato pero as molestias nun xeonllo e a dificultade dun primeiro rival no seu mellor momento alonxaron ao noso deportista de culminar a súa magnífica carreira deportiva co sabor duns Xogos Olímpicos.

Cuba agora comezará un proceso de recuperación tralo cal decidirá si se mantén activo e retoma as competicións de cara ao 2025.

1º POSTO POR EQUIPOS EN LIBRE OLÍMPICA

Esta fin de semana disputouse no Pavillón do CGTD de Pontevedra o Campionato Galego Sénior de loitas olímpicas ao que acudimos con 5 loitadores na modalidade de Libre Olímpica.

En menos de 125 kg Catriel Pehuén acadou o ouro sen moita oposición dos rivais, igual que Ramón Monasterio en menos de 97 kg. Ramón venceu  nesta categoría ao tamén vilalbés Kevin Cuba que  acadou a prata.

En menos de 74 kg Carlos Yobani tamén gañou a prata despois de 4 anos de parón deportivo. A terceira prata  a conseguiu Xiao Seoane en menos de 65 kg.

Varios destes loitadores comezarán a preparar agora os próximos campionatos de España que terán lugar en Pontevedra o próximo mes de xuño.

Por equipos o noso club acadou o primeiro posto na modalidade de libre olímpica e un meritorio 3º posto na clasificación xeral na que se suman os puntos acadados en libre olímpica, grecorromana e libre feminina.

KEVIN CUBA GAÑA O T.I JÓVENES PROMESAS

Esta fin de semana disputouse en terras La Nucia (Alicante) o Torneo Internacional Jóvenes Promesas que a  Federación Española organiza dentro do calendario da United World Wrestling e no que os mellores loitadores das categorías previas á senior teñen a oportunidade de enfrontarse a loitadores doutros países.

O noso deportista Kevin Cuba puido loitar na xornada do sábado na categoría U17 alzándose co ouro en menos de 92 kg. Tras alzarse co primeiro posto deuselle a oportunidade de disputar a categoría U20, xa na xornada de domingo, e na que conformouse co bronce tras gañar ao británico Joab Snyed e perder por superioridade ante Iago fernández e Mikola Tolmachov.

Kevin permanecerá concentrado esta semana no CAR Infanta Cristina de Murcia de onde sairán os selecciónados para os europeos e mundiais das diferentes categorías.

2º POSTO NA XORNADA NORTE DA LIGA DE DEPORTE BASE

 Este sábado acudimos a Vila de Cruces para participar coas nosas e os nosos deportistas máis xóvenes na Fase Norte da Liga de Deporte Base de Loita.

Nesta fase participaron máis de 200 nenas e nenos de entre 5 e 13 anos en equipos mixtos pertencentes a 7 clubs.

O noso equipo foi un dos máis numerosos rematando en 2ª posición por detrás da Escola Ayude de Santiso que co Keltoi de Vila de Cruces en 3 lugar,  seremos os 3 clubs que participaremos na final A da Liga de Deporte base xunto aos 3 clubs clasificados na pasada Fase Sur.

Esta actividade ten un carácter lúdico no que prima a participación de todas as nenas e nenos con independencia do nivel ou tempo de práctica adaptando o regulamento ás e aos máis novos.

Para a próxima final do 25 de maio contamos con levar un equipo con máis deportistas que tentarán demostrar o aprendido durante as escolas deste ano.

RECEPCIÓN NO CONCELLO

Esta semana as nosas e os nosos deportistas participantes nos pasados campeonatos de España U13, U17 e U20 foron recibidos no Concello de Vilalba pola nosa alcaldesa Marta Rouco e a concelleira de deporte Paula Vigo. As autoridades municipais felicitaron de maneira especial a Jimena García por ser  a primeira vilalbesa en acadar o título de Campiona de España na categoría U 13 e a Kevin Cuba por facerse co ouro en U117 e a prata en U20. 

Quique González, Héctor Somoza e Bruno Pintos tamén foron felicitados pola súa participación nos pasados campionatos de España U13 que se celebraron o 16 de marzo en León.

OUROS VILALBESES NOS CAMPIONATOS DE ESPAÑA U13 e U17

Este sábado tiveron lugar os Campionatos de España de loitas olímpicas das categorías U13 e U17 no Palacio dos Deportes de León nos que tivemos unha nutrida representación vilalbesa.

En U13 temos que destacar os ouros de Jimena García en menos de 60 kg e Enrique Seoane en menos de 65 kg, mentres que Héctor Somoza acadou un meritorio 5º posto en menos de 50 kg.

En U17 foi Kevin Cuba o que se fixo co ouro en menos de 92 kg acadando por segunda vez o título de Campión de España.

O noso club foi o que máis Campións de España aportou para a Selección Galega que se fixo co segundo título por comunidades autónomas.

Ademais dos vilalbeses tamén temos que destacar os resultados acadados polos loitadores do Club de Loita Lugo, destacando os bronces de Clara Carromacho en U17 e Ana López en U23 e o 7º posto de Bruno Pintos en menos de 45 kg U13.

A semana que ven Kevin Cuba voltará a loitar nos Campionatos de España da categoría U20.

CONCENTRACIÓN AUTONÓMICA U17

 

Este sábado estivemos na concentración autonómica que a Federación Galega organizou no CGTD de Pontevedra para reunir aos próximos participantes nos Campionatos de España das categorías U15 3 U17 que se disputarán en León o próximo 16 de marzo xunto á categoría U13.

En Pontevedra estivo Kevín Cuba que se prepara para loitar a categoría de menos de 92 kg tanto en cadete como en júnior.

A León tamén viaxarán varios loitadores vilalbeses que participarán na categoría de U13.

CONCENTRACIÓN AUTONÓMICA U13

Varios dos nosos deportistas participaron este sábado na concentración preparatoria previa aos Campionatos de España U13 que terán lugar en León o próximo 16 de marzo. A actividade tivo lugar nas instalacións do CGTD de Pontevedra e asistiron os medallistas dos pasados campionatos galegos.

A actividade asistiron Omar Guerreiro, Lucas García, Antón González, Héctor Somoza, Enrique Seoane, Noela González, Noelia Vilasuso, África Montenegro e Alejandra Valle acompañados do técnico Iván Castro.

VILALBA CAMPIONA DE GALICIA U13

 Hoxe celebráronse os Campionatos Galegos das categorías U13 e U17 no Pazo Provincial dos Deportes de Lugo nos que o noso club alzouse co primeiro posto por equipos na categoría U13 ao acadar 3 ouros e 3 bronces en loita feminina e 2 ouros e 1 bronce loita masculina.

Os ouros en loita feminina os acadaron Alejandra Valle en menos de 45 kg, África Montenegro en menos de 60 kg e Jimena García en menos de 65 kg. Os bronces foron para Noela González en menos de 60 kg e Noelia Vilasuso en menos de 65 kg.

En loita femina tamén participaron Lara Fernández en menos de 40 kg e Carmen Paredes en menos de 65 kg.

Os ouros en loita masculina foron para Héctor Somoza en menos de 50 kg e Enrique Seoane en menos de 65 kg mentres que Omar Guerreiro fíxose co bronce en menos de 35 kg.

En maculino U13 tamén participaron Lucas García e Marco Gaute en menos de 40 kg, Antón González e Xavi Yañez en menos de 45 kg.

Bruno Pintos que loitou polo Lugo acadou o bronce en menos de 45 kg.

Todos os deportistas tiveron un gran desempeño tendo en conta que era a primeira competición dos U13 co regulamento oficial, pero os resultados femininos teñen un sabor especial por seren os primerios podios en loita feminina na historia do noso club.

Na categoría U17 tivemos a representación de Kevin Cuba que domiñou a categoría facéndose co ouro en menos de 92 kg. 

As próximas citas, xa no mes marzo, serán os campionatos de España das categorías cadete e júnior nas que participará Kevin así como o inicio das Xornadas de Deporte Base nas que presentaremos un equipo mixto de nenas e nenos.

KEVIN CUBA 3º NO CAMPIONATO GALEGO JÚNIOR

 Os noso club participou esta fin de semana nos Campionatos Galegos de loitas olímpicas da categoría júnior que tiveron lugar no Pavillón do CGTD de Pontevedra. Os deportistas que nos representaron foron Kevín Cuba en menos de 125 kg e Xiao Seoane en menos de 65 kg.

Kevin acadou o bronce mentres que Xiao tivo que conformarse cun 5º posto tras gañar un enfrontamento e perder os dous seguintes.

A próxima competición será o Galego U17 no que Kevin volverá a competir na súa catogoría de idade e no seu peso 92 kg.

Xiao seguirá adestrando para coller experiencia nos próximos torneos de clubs aos que podamos asistir.