VILALBA REMATA PRIMEIRA POR EQUIPOS NO TORNEO HQR DE PONTEVEDRA

O equipo vilalbés rematou en primeira posición  pos clubs na terceira edición do Torneo HQR  organizado polo Club Pontevedra dentro dos actos da festa do deporte promovida polo Diario de Pontevedra.
A competición que se disputou nas categorías de cadete e senior contou coa presenza de máis de 10 clubs galegos que se mediron o sábado en xornada de tarde no pavillón do Estadio da Xuventude da cidade do Lérez.
No equipo de Vilalba destacaron Ramón Monasterio na categoría cadete en menos de 80 kg cun segundo posto, e xa na categoría sénior Marcos Carral cun bronce en menos de 70 kg, Pablo Chao cun quinto posto en menos de 80 kg, Jose Luís Puentes cun ouro e Marcos Miragaya cun bronce en menos de 90 kg e Jose Cuba cun ouro, Catriel Pehuén coa prata e Francisco Monasterio co bronce en menos de 120 kg.
O outro equipo lucense foi o rábade que con Boris Otero (bronce), David Grandío (Bronce) e Martín Fernández (bronce) fixeron desta provincia a máis laureada do evento.
Queremos felicitar a Marcos Mirgaya, responsable do Club Pontevedra e deportista do noso club, pola boa organización do evento e agradecerlle que nos convidara para tomar parte nel.
Este torneo é a mellor proba de cara a avaliar aos deportistas que se medirán este mes de xaneiro no campionato galego, proba clasificatoria para os campionatos de España 2013.
PREME AQUÍ PARA VER AS FOTOS

ADESTRAMENTOS NO NADAL

Durante esta festividade, do día 24 de Decembro ao 4 de Xaneiro, os adestramentos pasan a ser de mañá de 11:30 a 13:30 horas.

VILALBA NA ASAMBLEA DA FEDERACIÓN ESPAÑOLA DE LOITA

I.Castro como Presidente da mesa elctoral da FELODA

A representación galega na Asamblea Estatal da Federación Española de Loitas Olímpias e Disciplinas Asociadas que este sábado reuniuse pra reelexir a D. Angel López Rojo como o seu presidente, componse de 5 membros, dos cales 3 son vilalbeses; José Cuba no estamento de deportistas, Nicolás Castro no estamento de adestradores e Iván Castro como representante do Vilalba no estamento de clubs, súmanse ao vigués Diego Villanueva no estamento de arbitros e ao compostelán Jose Luís Olazábal que como presidente da federación galega.
Galiza acada así unha histórica representación no máximo órgano rector da federación estatal, unha representación con sabor vilalbés que tentará achegar propostas e colaborar na mellora do noso deporte e as condicións dos seus practicantes.

NOVAS ESCOLAS DEPORTIVAS DE COSPEITO E GUITIRIZ

Os concellos de Cospeito e Guitiríz súmanse ao de Xermade na inclusión das loitas olímpicas dentro da súa oferta das escolas deportivas municipais. Estas novas escolas intégranse dentro do programa da escola comarcal de loitas olímpicas que o club vilalbés está a levar a cabo co financiamento da deputación provincial e os patrocinadores da entidade, e que xunto coa colaboración dos concellos e a federación galega de loita tentarán facer da comarca da Terra Chá un referente das loitas olímpicas a nivel estatal.
Iván Paredes, un dos técnicos do club vilalbés, será o responsable destes novos puntos de adestramento aos que agardamos que neste mesmo ano se sume a escola de Begonte na que xa hai varios rapaces apuntados.
De momento non son moitos os rapaces e rapazas que están a participar, pero agardamos que pouco a pouco os grupos vaian medrando e con eles aumentar o o servizo en cada un dos concellos.
Os interesados poden inscribirse na actividade durante todo o ano, actividade que nun principio estase a realizar os Luns de 13:45 a 14:45 horas no Ximnasio do CPI Virxe do Monte en Cospeito e os Xoves de 16:00 a 17:30 horas na Casa Habanera de Guitiriz.
Para obter máis información poden enviarnos un email a : loitaolimpicavilalba@yahoo.es.

2ª COPA DEPUTACIÓN DA CORUÑA

Vilalba viaxou esta fin de semana a Melide cun pequeno equipo da categoría alevín para disputar a 2ª edición da Copa Deputación da Coruña de loitas olímpicas. Nesta competición puidemos desfrutar do nivel acadado por moitos deportistas que con apenas 8 anos esfórzanse en executar os mellores movementos propios dos loitadores de elite.
Os vilalbeses a pesares de ter unha boa actitude durante a competición, notouselles a falla de rodaxe nesta tempada que hai pouco máis dun mes que comezou para eles. A pesares disto todos subiron ao podio colocando a Vilalba no 6º posto na clasificación por equipos.
O loitadores vilalbeses que viaxaron a Melide foron: Fermín e Raúl Sanz Cendán, Samuel García Miragaya, Angel García Yañez, Brais Arias Apenela, Carlos García e Roberto Díaz Orosa.

NOVA ESCOLA DEPORTIVA DE LOITA DE XERMADE

I.Paredes durante o descanso dun combate

Dende hai un par de semanas os rapaces de Xermade poden practicar e coñecer este milenario deporte da man dun dos técnicos do Club de Loitas Olímpicas de Vilalba. Iván Paredes será o responsable deste grupo que en principio adestrarán os venres de 16:00 a 17:00 horas.
Iván foi varias veces campión galego e medallista dos campionatos de España das diferentes categorías e leva varios anos colaborando coas categorías inferiores do club vilalbés acadando importantes resultados como adestrador. Sen dúbida esta é unha grande oportunidade para os nenos e nenas de Xermade de poder practicar un deporte divertido e saudable da man dun dos mellores técnicos cos que se pode contar.
Ao longo das próximas semanas comezarán a funcionar novas escolas deportivas no entorno da comarca da Terra Chá. Tralas actividades de promoción realizadas nos centros educativos da comarca, serán varios os concellos que acollan estas actividades coordinadas polos técnicos do club vilalbés e a Federación Galega de Loita.

ESCOLAS DEPORTIVAS MUNICIPAIS

Está aberto o prazo único para a inscribirse nas escolas deportivas e que remata o próximo venres 5 de Outubro. Lembrade que é imprescindible apuntarse á escola deportiva municipal de loita para poder adestrar de xeito gratuíto con nós. No caso de non inscribirse haberá que abonar ao club 15 € mensuais para poder adestrar.
Preme AQUÍ para máis información.

OS NOSOS PARABÉNS PARA VERÓNICA E CUBA NO DÍA DO SEU CASAMENTO

O sábado moitos de Nós tivemos a sorte de poder acompañar a Verónica e a Cuba no inicio dunha nova andaina. Eles decidiron unir as súas vidas en matrimonio e honráronnos ao facernos testigos de tan emotivo acto. Desexámosvos toda a sorte do mundo e dámosvos as grazas por permitirnos formar parte das vosas vidas.

MODIFICACIÓN DOS HORARIOS DE ADESTRAMENTO

DE NOVO A ADESTRAR

Lembrade que hoxe voltamos aos adestramentos diarios a partir das 20 horas para todos  os competidores. De momento e por mor dos recortes que estamos a sufrir nesta inxusta crise, anúlanse os adestramentos da mañá pasando a facerse un único adestramento diario. A partires de Xaneiro e unha vez coñecido o presuposto do clube para a próxima tempada saberemos se voltarmos á dobre sesión diaria, imprescindíbel para a alta competición, ou se incluso teremos que eliminar máis días de adestramento semanal.

O noso desexo e poder manter o nivel e calidade dos adestramento que tan bos deportistas está a dar, pero ata entón so queda animarvos para que seguidades a traballar para acadar as vosas metas. Vémonos pola noite.

EXHIBICIÓN DE LOITAS OLÍMPICAS NAS FESTAS DE RÁBADE

O club de Rábade convidou aos loitadores vilalbeses para participar nunha exhibición de loitas olímpicas en pleno centro da vila con motivo da celebración das súas festas patronais. Un total de 18 deportistas entre nenos e adultos fixeron unha pequena mostra do traballo que cada día levamos a cabo nos adestramentos de loita, e foron varios de entre o público asistente os que se achegaron a Marcos Carral (adestrador de Rábade) interesándose pola actividade para inscribir aos seus pequenos de cara ao próximo curso académico.
Temos que felicitar aos compañeiros de Rábade e en especial a Carral polo bo traballo que están facer.
PREME AQUÍ PARA VER MÁIS FOTOS DA ACTIVIDADE

ARTHUR TAYMAZOV PROCLÁMASE CAMPIÓN OLÍMPICO POR TERCEIRA VEZ CONSECUTIVA

Taymazov claims third successive gold - London 2012 Olympics

NORABOA MAIDER

Sen dúbida un gran éxito para a loita, pero sobre todo para esta deportista. É interesante ver como o esforzo, a tesón e o valor poden sustituir a falla de medios para chegar a acadar grandes cousas.
Es un exemplo pra todos nos, e agardamos que tamén o sexas para aqueles que xestionan o deporte e que a miudo cren que as loitas olímmpicas non precisan de medios ou infrastructuras para a súa práctica.
NORABOA E APERTAS DOS VILALBESES PARA TI E TAMÉN PARA CRESPO QUE SEMPRE ESTIVO AO TEU CARÓN. 

Men's 84kg Greco-Roman Photos - Olympic Wrestling | London 2012 Olympics

Men's 84kg Greco-Roman Photos - Olympic Wrestling | London 2012 Olympics

Olympic Wrestling - Schedule, Results, Medals | London 2012

Olympic Wrestling - Schedule, Results, Medals | London 2012

Nike Wrestling Commercial

VIDEO DE JORDAN BURROUHS CAMPIÓN DO MUNDO NO 2011

RUSIA VS USA EN PLENO BROADWAY

POCOYO E A LOITA LIBRE OLÍMPICA

NOVOS HORARIOS DE ADESTRAMENTO DE VERÁN

Lembrade que o clube seguirá a traballar durante o verán ata o próximo 15 de Agosto, data na que pecharemos as portas durante un mes retomando a actividade a partires do 15 de Setembro.
Dende inicios de Xullo realizamos unha única sesión diaria ás 12 da mañá, e poden vir todos os deportistas que adestran habitualmente na clase dos adultos así como aqueles escolares que compitan e que na próxima tempada comecen a adestrar neste grupo.
VER FOTOS DOS ADESTRAMENTOS DE VERÁN

LOITAS OLÍMPICAS NOS CAMPAMENTOS OLÍMPICOS DE GUITIRIZ

O Clube de Loita de Vilalba colaborou cos campamentos deportivos de verán do concello de Guitiriz achegando esta disciplina a máis de medio centear de nenos e nenas que participaron nas actividades.
Os participantes poideron coñecer varias disciplinas olímpicas da man de clubs e deportistas de recoñecido prestixio, algún deles olímpicO.

A PARTIRES DESTA SEMANA RETOMAREMOS A ACTUALIZACIÓN DO BLOG

Queremos perdirvos desculpas por ter desatendido o noso blog durante estas últimas semanas. Arranxados certos problemas comezaremos de novo a publicar toda a actualidade sobre os nosos deportistas e as actividades nas que participan.
Un saúdo a todos

VILALBA REMATA 6ª NA LIGA DE DEPORTE DE BASE

Esta fin de semana disputouse en Compostela a fase final da Liga Galega de Base de Loitas Olímpicas. Vilalba que disputaba a final entre os 6 mellores clubs galegos, tivo que conformarse co 6º posto ao contar co equipo menos numeroso da final A, aínda así temos que resaltar o progreso e o nivel amosado polos nosos deportistas que cada día parecen desfrutar máis deste deporte e destas competicións por equipos.
Os outros clubs lucenses foron o Lugo e  o Rábade que obtiveron uns meritorios 13º e 10º posto ao contar con equipos moi reducidos en relación aos seus opoñentes.
Con esta actividade clausúranse os adestramentos das Escolas Deportivas de Loitas Olímpicas que se reanudarán o próximo mes de Outubro.
VER MÁIS FOTOS

DEPORTISTAS DGAN

Publícanse as bases para a concesión das axudas para os deportistas galegos de alto nivel da Secretaría Xeral para o Deporte. Tamén se abre o prazo para solicitar a consideración de DGAN. Os interesados poden ir ao enlace da páxina da Secretaría Xeral para o Deporte premendo AQUÍ

A DEPUTACIÓN PROVINCIAL CONVOCA AXUDAS PARA DEPORTISTAS DA PROVINCIA

A área de Benestar Social, Deporte, Igualdade e Mocidade da Deputación de Lugo convoca as axudas para deportistas individuais  da provincia de Lugo. Son moitos os loitadores vilalbeses que cumpren os requisitos para seren beneficiarios destas axudas que sen dúbida contribuirán a facilitar e mellorar o seu acesoa á práctica deste deporte.
Podedes obter toda a información no seguinte enlace.PÁXINA DA DEPUTACIÓN

VILALBA NON TERÁ UN DEPORTISTA NOS XOGOS DE LONDRES 2012

Tras pasar a primeira eliminatoria con facilidade os soños de Cuba de estar nos Xogos de Londres 2012 esfumáronse no combate ante un descoñecido Digovich. Todo parecía estar a favor do vilalbés que comezou dominando no que semellaba un combate doado, pero houbo algo que lle deu a volta á situación favorecendo ao sudafricano e levándoo a unha victoria que se lle presentaba pouco probable ao inicio do enfrontamento.
Tentaremos agora estudar que foi ese algo, ese factor que fixo que o noso deportista, que críamos preparado, non soubese ou poidese chegar a onde debería e merecía que non é outro sitio que os Xogos Olímpicos.
Levo visto o combate unhas 20 veces e en cada unha delas só vexo traballo que non fxemos e cousas que como adestrador non souben prever. Centreime tanto nos adversarios a superar que esquencinme daqueles que crin non revestían perigo para o noso deportista, e isto foi unha equivocación que se materializou en erros infantís sobre o tapiz, erros que lle regalaron o combate a un adversario descoñecido e deixaron a Cuba fora da competición para a que levaba traballando tanto tempo.
Dende logo un combate pra non esquecer e que seguirei vendo ata que teña unha resposta.  Polo de agora só me queda valorar o meu papel nesta entidade e estudar un proxecto de futuro que probáblemente inclúa a novas persoas cunha visión renovada.
IVAN CASTRO

CUBA TERÁ MAÑÁ A DERRADEIRA OPORTUNIDADE DE GAÑAR A PRAZA PARA OS XOGOS OLÍMPICOS

José Cuba terá mañá a derradeira oportunidade de clasificarse para os Xogos Olímpicos de Londres 2012 nunha competición de altísima tensión pola necesidade de todos os participantes de chegar á final se non queren quedar fora do soño olímpico.
Hoxe coñeceremos o emparellamento que revelará aos posibles contrincantes que o vilalbés terá que superar para acadar o obxectivo polo que tanto tempo leva traballado.
BOA SORTE COMPAÑEIRO!.

CUBA ESGOTA OUTRA OPORTUNIDADE

Helsinki será a derradeira esperanza do vilalbés para estar nos xogos de Londres 2012 ao caer hoxe en primeira ronda ante búlgaro Kumchev. A pesares de haber máis prazas, a competición de Taiyuan non prometía moito para Cuba ao ver o sorteo inicial que o comprometía a enfrontarse cos loitadores máis duros do evento agás o iraní Haidi Basmanj que se alzou co primeiro posto indo polo grupo de arriba.
A maioría dos loitadores que obteron a clasificación son dun nivel parello ao do vilalbés e algúns incluso xa teñen sucumbido ante Cuba en pasados enfrontamentos, o que aínda nos deixa un atisbo de esperanza de cara a Helsinki o próximo fin de semana.

JOSÉ CUBA NON SE CLASIFICA EN BULGARIA

O vilalbés José Cuba terá que esperar ao clasificatorio de Tayuan (China) para loitar por unhas das 5 prazas olímpicas ao non conseguir pasar da primeira rolda en Bulgaria.
O vilalbés, que non tivo un dos seus mellores días, caeu no primeiro combate co representante alemán Nick Matuhin quedando fora de calquera posibilidade de chegar á final. Aínda que sabiamos que non habería adversarios doados, o sorteo inicial fíxonos crer na posibilidade de acadar a praza olímpica en Varna sendo o xermano quén nos devolveu á máis crúa das realidades. O camiño a Londres non será doado para Cuba nin para ningún dos seus compañeiros de seleción.
Hoxe partirán cara a Tayuan co obxectivo de non deixar escapar máis oportunidades e acadar o pasaxe para Londres sen necesidade de viaxar a Helsinki.

CUBA PARTE PARA O CLASIFICATORIO DE BULGARIA

A cidade búlgara de Varna está a acoller aos mellores loitadores europeos que buscan clasificarse para os Xogos Olímpicos de Londres, entre eles atópase o noso mellor deportista que ven de traballar moi duro nestas últimas datas para facer historia colocando a un vilalbés no xogos.

Cuba partiu hoxe cara a Bulgaria onde disputará as súas roldas clasificatorias o próximo sábado co obxectivo de chegar á final, posto que lle daría a praza olímpica.

DAVITASHVILI E KATCHALAEV REGRESAN A VILALBA

Este venres regresan a Vilalba os rusos Davitashvili e Katchalaev para ultimar a posta en forma de Cuba de cara ao próximo clasificatorio de Bulgaria hacia onde partirá o próximo día 18.
Davitashvili e Katchalev permanecerán en Vilalba até o Martes 17 onde segurirán a realizar adestramentos abertos, polo que queremos lembrar aos interesados en participar nolo comuniquen para coordinar a asistencia debido á falta de espazo.

MONASTERIO E LÓPEZ SELECIONADOS COS MELLORES DE ESPAÑA

O vilalbés Francisco Monasterio e o lucense Nicolás López partiron onte cara a Murcia para participar na concentración estatal de tecnificación onde se selecionan aos xóvenes talentos para os circuitos internacionais das categorías júnior e cadete. Destes circuitos sairán os representantes españois nos próximos europeos e mundiais de loitas olímpicas. A pesares da súa falta de rodaxe, Nicolás e Fran amósanse esperanzados de seren selecionados debido á boa progresión que ambos demostraron na presente tempada. Do que si estamos seguros é do magnífico futuro deportivo que lles agarda de seguiren a traballar como o están a facer, Fran en Vilalba e Nicolás no CGTD de Pontevedra.
DESEXAMOS TODA A SORTE  DO MUNDO PARA OS NOSOS CAMPIÓNS.

O TerraCha.xa recolle a nova sobre as Terceiras Xornadas Internacionais de Loitas Olímpicas

VER A NOVA

3ª XORNADAS INTERNACONAIS DE LOITAS OLÍMPICAS

Desde o pasado Venres dia 30 estamos a celebrar en Vilalba as Terceiras Xornadas Internacionais de loitas olímpicas que buscan a convivencia e adestramento dos nosos deportistas con algúns dos mellores loitadores do mundo. En pasada edicións poidemos contar con campións do mundo e medallistas olímpicos como o cubano Alexis Rodriguez ou medallistas nos europeos como o ucraniano Sergei Priadun ou o ruso Valeri Bedoev.
Nesta ocasión o noso convidado e o osetio Dato Davitashvili, semifinalista nos pasados campionatos de Rusia e unha das xóvenes promesas da potencia do leste. Dato amósase sorprendido polo nivel dos deportistas dun clube tan pequeno, especialmente no caso de Cuba co que está a traballar arreo de cara ao próximo clasificatorio para os Xogos Olímpicos que terá lugar en Varna (Bulgaria) o próximo 20 de Abril.
Como sempre, e para facilitarnos o traballo tamén contamos coa axuda de Alexander Katchalaev que nestes días colle a batuta do club vilalbés para sacarlle o máximo partido aos adestramentos.
Dato amosouse moi contento de coñecer persoalmente a Katchalaev, xa que dende pequeno oíra falar dél como unha das grandes figuras deste deporte nos tempos da URSS, nos que Sasha foi selecionador e principal artífice da época dourada da loita soviética.
Lembrar a todos os interesados que esta é unha actividade aberta e que poden vir aos adestramentos calquera deportista dos clubs galegos pero debido ás nosas limitacións de espazo rogamos  que nos avisen con antelación para distribuir aos deportistas en diferentes sesións.

REPORTAXE DAS XÓVENES PROMESAS LUCENSES NO PROGRESO

El Progreso recolle unha ampla reportaxe sobre os ouros acadados no pasado Campionato de España de Loitas Olímpicas polas xóvenes lucenses das loitas olímpicas. Nicolás López en grecorromana e Francisco Monasterio en libre olímpica trouxeron, nestas modalidades,os dous únicos metais dourados para Galicia nos pasados campionatos de España Júnior que tiveron lugar en Albolote (Granada).
Sen dúbida que esta reportaxe daralles máis ánimo para seguir a traballar na procura de novos éxitos. Nicolás ademais acaba de ser homenaxeado no concello de Lugo pola corporación local, onde o felicitaron ante numerosos medios polo seu segundo título de Campión de España.
VER REPORTAXE

VILALBA CLASIFÍCASE PARA A FINAL DA LIGA DE DEPORTE DE BASE

O Club de Loitas Olímpicas acudiu con 17 deportistas á fase norte da xornada de competición  deportiva en idade escolar que se celebrou no Pavillón Municipal de Frigsa en Lugo. Os nosos deportistas que aínda se amosaron un pouco verdes nesta primeira competición da tempada, lograron colocarse no terceiro posto clasificándose así para a fase final da Competición Deportiva en Idade Escolar que terá lugar en Compostela o próximo 19 de Maio. Nesa xornada de liga Vilalba disputarase o título de campión galego entre os 6 mellores clubs de Galicia.
Non nos podemos esquecer dos  outros clubs lucenses que participaron esta fin de semana en Lugo, e que a pesares do súa boa acutación non puideron clasificarse para a loita pola final. A pesares de gañar a maioría dos enfrontamentos Rábade co seu 5º posto e Lugo co 6º non foron capaces de colocarse entre os 3 primeiros debido en gran parte á participación con equipos menos numerosos. Aínda así tanto Rábade como Lugo tentarán obter o primeiro posto da final B que tamén terá lugar en Compostela.
Queremos dar a noraboa aos todos os deportistas que esta fin de semana deron mostra do seu bo traballo.
O equipo vilalbés estivo formado por:

1. Martín Silvosa Fraga.
2. Samuel García Miragaya.
3. Fremín Sanz Cendán.
4. Hugo Prieto Ardao.
5. Jose Antonio Paz Eimil.
6. Raúl Sánz Cendán.
7. Alejandro Gahthier Sampayo.
8. Angel García Yañez.
9. Carlos García.
10. Roberto Díaz Orosa.
11. Brais Arias Apenela.
12. David Ramudo Ares.
13. Angel Álvarez Rey.
14. Yeray Calvo González.
15. Borja Rey Dopico.
16. Joao Pedro Vieira Lucena. 
17. Raúl González Seco.

 VER MÁIS FOTOS

O CAMPIONATO DE EUROPA NO DIARIO EL PROGRESO

VER NOVA

FRANCISCO MONASTERIO E NICOLÁS LÓPEZ CAMPIÓNS DE ESPAÑA

Éxito dos loitadores da provincia no campionato de España júnior de loitas olímpicas que ven de celebrarse na localidade granadina de Albolote no que o equipo galego acadou catro ouros na totalidade de modalidades.
En libre olímpica o único ouro para a seleción galega foi para o vilalbés Francisco Monasterio en menos de 120 kg que venceu na final ao loitador andaluz por tocado de espaldas.
O outro lucense en Granada, Nicolás López tamén subiu ao máis alto do podio na modalidade de grecorromana en menos de 120 kg consolidando á provincia como unha boa escola de pesos pesados.
Os outros dous ouros para o noso equipo foron das loitadoras Noelia Lalín do Club Keltoi e Lidia Pérez do Club Pontevedra.
Queremos dar a noraboa a todos e darlles ánimos para que continúen a adestrar duro co obxectivo de seren selecionados para participar nas próximas citas internacionais coa seleción española.
Tamén queremos dar o noso ánimo a Ramón Monasterio que por unha doenza de última hora non puido viaxar a Albolte onde seguro traería outro metal para Vilalba, pero con tan só 14 anos aínda terá tempo de brindarnos grandes xestas.

A VASCA MAIDER UNDA 3ª DE EUROPA

A loitadora olímpica Maider Unda volve subir ao podio tras unha gran participación no europeo sénior que acaba de rematar en Belgrado. Maider venceu nas dúas primeiras roldas ás loitadoras francesa e bielorusia respectivamente, e tras perder en semifinasis coa loitadora noruega que acabou por levarse o título, venceu na repesca á deportista acerí facéndose deste xeito co único metal do equipo español.
Noraboa Maider

CAMPIONATO DE EUROPA SENIOR

Rematada a participación de José de Cuba no europeo voltamos quedar cunha sensación agridoce e pouco clarificadora do estado de forma do noso deportista.  Tras librar a primeira rolda, meteuse en oitavos de final onde  cumpriu ao vencer por tocado de espaladas ao eslovaco Hutnan.

En cuartos enfrontariase ao húngaro Ligeti, o que nos deu grandes espranzas ao tratarse dun loitador de nivel moi parello ao de Cuba e un dos seus principais rivais a loitar polas prazas olímpicas a partir do mes de Abril, pero o combate co húngaro foi un xarro de auga fría, especialmente o primeiro asalto onde o Ligeti impúxose con superioridade. Cuba tentou remontar no segundo asalto onde as forzas estiveron máis igualadas pero o hungaro demostrou que chegou a Belgrado nun mellor estado de forma.

A chegada de Ligeti á final fíxonos sentir a amargura do éxito que se escapa, pero tamén lle deu a oportunidade a Cuba de loitar polo bronce na repesca onde perdeu ante un Davit Mozmanashvili moi superior.

Cremos que temos moito que mellorar polo que a próxima semana concentrarémonos no CGTD de Pontevedra para preparar o primeiro clasificatorio de Abril, onde Cuba terá que medirse de novo a Ligeti pero esta vez coa obriga de gañar se quere estar nos Xogos de Londres.

CAMPIONATO DE ESPAÑA JUNIOR E ESCOLAR DE LOITAS OLÍMPICAS

O equipo galego de loitas olímpicas parte hoxe cara a poboación granadina de Albolote, onde se disputará o campionato de España de loitas olímpicas das categorías escolar e júnior. A representación lucencense verase mermada pola obrigada ausencia de Ramón Monasterio que terá que quedar na casa por prescrición médica tras unha doenza neste últimos días. Ramón era un dos principais favoritos da categoría escolar en menos de 73 kg tras acadar o bronce no pasado campionato de España da categoría cadete.

Deste modo a representación lucense reducirase a Nicolás López en menos de 120 kg grecorromana e Francisco Monasterio en menos de 120 kg en libre olímpica. O lucense tentará revalidar o título acadado na pasada tempada, mentras que o vilalbés viaxa coa ilusión de dar a sorpresa na máxima categoría de libre olímpica. 

CUBA ADAPTASE AOS ADESTRAMENTOS EN BAKÚ

Cuba e Gazyumov, Bakú 2012

O vilalbés José Cuba comeza a adaptarse aos adestramentos na capital acerí onde permanece concentrado dende o pasado martes 21 de febreiro. Cuba que comezou a semana moi fatigado polo cambio de adestramentos, comeza agora a ter unhas mellores sensacións no tapiz. Arroupado de algúns dos mellores loitadores do momento como o varias veces campión mundial en 96kg Gazyumov, que xunto co vilalbés tentará clasificarse para os Xogos Olímpicos o próximo mes de Abril en Bulgaria. A eliminiación do acerí por unha lesión no xeonllo no pasado mundial, foi toda unha sorpresa que ademais o deixou sen a praza olímpica.
A próxima cita destes deportistas será o Campionato de Europa de Belgrado, proba moi reveladora do estado de forma co que chegarán aos clasificatorios para as tan preciadas prazas olímpicas. 

OURO DE NICOLÁS LÓPEZ (CLUB DE LOITA LUGO) NO GALEGO JUNIOR DE LOITAS OLÍMPICAS

Onte tivo lugar en Touro os campionatos galegos de loitas olímpicas das categorías Escolar e Júnior na vila coruñesa de Touro. Vilalba viaxou á cita con dúas das súas novas promesas, os irmáns Monasterio que se alzaron con sendas pratas nas súas categorías.
Ramón Monasterio que participou na categoría escolar en menos de 73 kg perdeu a final nun axustado combate ante o representante do Club Sabarís de Baiona. A pesares disto, o potencial amosado durante a competición así como a progresión que está a experimentar dende o seu ingreso no CGTD de Pontevedra, o vilalbés será un dos representates do equipo galego nesta categoría nos próximos campionatos de España que terán lugar en Granada o próximo mes de Marzo. Ramón viaxará a Granda por petición do selecciónador galego Alfredo Marcuño.
Na categoría Júnior en menos de 120 kg contamos coa presenza do seu irmán Fran, que non tivo un gran día a pesares de obter a prata tanto en Libre Olímpica como na modalidade de Grecorromana. Na modalidade de Libre quedou eliminado por tocado de espaldas ante o loitador local Damián Iglesias, actual campión de España Junior de menos de 96kg. O vilalbés pasou a primeira rolda vencendo a Nicolás López, outro lucense que tivo unha boa actuación acadando o bronce na categoría.
Na modalidade de grecorromana cambiáronse as tornas ao vencer Nicolás ( Club de Loita Lugo) ao vilalbés nun combate moi igualado que lle deu a praza ao lucense para os próximo campionatos de España onde tentará revalidar o seu título de Campión de España nesta modalidade.
Franciso que viaxará a Granada na modalidade de Libre Olímpica, será o terceiro lucense da expedición galega, sen dúbida unha mostra do progreso que está a ter este deporte na provincia.
NORABOA E BOA SORTE A TODOS.

CONCENTRACIÓN INTERNACIONAL EN ACERBAIJÁN

O vilalbés José Cuba partiu onte cara á capital acerí para tomar parte da concentración internacional preparatoria para o próximo campionato de Europa que terá lugar a partir do 6 de Marzo en Belgrado. O viaxe e estancia de Cuba en Bakú está financiada polo Club Vilalba e a Federación Galega de Loita, que nestes tempos tan difíciles están a facer un enorme esforzo por axudar a que o vilalbés conte cos medios precisos para acadar a clasificación para os xogos de Londres.
Cuba que se atopa no mellor momento da súa carreira ten moita esperanza nos próximos clasificatorios que comezan no mes de Abril, pero antes terá unha proba do máis alto nivel en Belgrado na que terá que medirse cos principais aspirantes para as prazas que aínda están en xogo. Sen dúbida a concentración de Bakú, onde estará arroupado polo noso amigo Alexis Rodríguez, servirá para poñer o rendimento do noso loitador no máis alto.

RECEPCIÓN DOS LOITADORES LUCENSES NA DEPUTACIÓN PROVINCIAL

Este venres o vicepresidente da Deputación Provincial, Antonio Veiga, recibíu aos loitadores da provincia que veñen de acadar diferentes preseas nos campionatos de España de loitas olímpicas. José Cuba, José Luís Puentes, Marcos Miragaya e os irmáns Monasterio do Club de Loita Vilalba, xunto con Nicolás López do Club de Loita Lugo, recibirán en persoa as felicitacións do máximo responsable en deportes do ente provincial.
Os responsables dos clubs lucenses así como o representante da Federación Galega de Loita Pablo Pintos, aproveitaron para agradecer persoalmente a sensibilidade que esta entidade está a ter co noso deporte sendo unha peza clave nos éxitos que estanse a conseguir.

RAMÓN MONASTERIO BRONCE NO CAMPIONATO DE ESPAÑA CADETE E MARCOS MIRGAYA CAMPIÓN DE ESPAÑA UNIVERSITARIO

O vilalbés Ramón Monasterio proclamaouse esta fin de semana terceiro de España Cadete na modalidade de Grecorromana. Con tan só 14 anos, este escolar foi capaz de gañar 2 combates nesta categoría e nunha modalidade, a de grecorromana, que non é a súa especialidade. Agora esta nova promesa vilalbesa prepará no CGTD de Pontevedra a súa participación nos campionatos escolares onde esperamos, agora con opoñentes da súa idade, chegue ao máis alto do podio.
Monasterio é unha mostra da canteira que empeza xurdir na provincia e que desexamos dea continuidade a loitadores como Nicolás Castro, Jose Luís Puentes ou o mesmísimo Cuba.
Non podemos deixar de falar de Marcos Miragaya que acaba de proclamarse campión de España universitario en menos de 96 kg e que venceu a todos os seus opoñentes con superioridade. O vilalbés retorna así á competición que deixara para adicarse a súa formación universitaria. Ademais Marcos é o responsable técnico do Club de Loita Pontevedra que acaba de proclamarse Campión de España Cadete por clubs, sen dúbida un referente dos novos adestradores galegos.
Pra Nós é un orgullo que ao igual que Mirgaya, outros adestradores e deportistas formados en Vilalba como Marcos Carral ou Nicolás Castro, sexan o motor da loita galega e os que están a levar este deporte a todos os recunchos do país.

REPORTAXE DE JOSE CUBA EN EL PAÍS

El diario El País publica na edición de hoxe unha reportaxe sobre o loitador vilalbés José Cuba que ven de acadar o seu 11º campionato de España en Murcia. VER REPORTAXE

JOSE CUBA VENSE DE MURCIA CO SEU 11º CAMPIONATO DE ESPAÑA

O primeiro posto acadado polo vilalbés foi o único ouro de loita libre olímpica para Galicia no campionato de España Sénior, e con este xa son 11 os campionatos estatais acadados por José que se consolida como o rei da máxima categoría. Pero este ouro non foi o único podio lucense en Murcia, temos que destacar a prata de Jose Luís Puentes que ía coa esperanza de liderar a categoría de menos de 84 kg pero caeu de novo ante o hispano-búlgaro Boris Andonov que formará, xunto con Cuba, parte do equipo preolímpico que tentará clasificarse para os xogos de Londres.
É moi importante destacar o traballo realizado polas novas promesas lucenses que viaxaron co equipo absoluto e foron quén de subir ao podio. Por un lado está o tamén vilalbés Francisco Monasterio que na categoría de menos de 120 kg acadou o bronce perdendo sómentes con Cuba, o seu compañeiro de club. Este loitador que aínda é Júnior está a demostrar unha gran progresión deportiva froito do seu traballo diario con loitadores de alto nivel o que garante nun futuro próximo a presenza dun rival a ter en conta na categoría de 120 kg.
Tamén en 120 kg pero na modalidade de grecorromana destacou a actuación do lucense Nicolás López que vense pra Lugo cun bronce moi meritorio por tratarse tamén dun loitador Júnior, sendo ademais o mellor exemplo do bo traballo que se está a levar a cabo dende o Club de Loita Lugo.
En total 4 preseas do equipo galego teñen sabor lucense, 3 para Vilalba e 1 para Lugo, e aínda que se votan en falta algúns primeiros postos non nos podemos esquencer das pratas de Eder Villanueva (El Castro de Vigo) ou de Miguel Caramés (Keltoi) e o bronce de Eliseo Permuy (Keltoi) que axudaron a clasificar a Galicia no segundo posto por seleccións. En grecorromana queremos destacar a prata de Borja Saavedra (San Ignacio) e os bronces de Pablo García (Pontevedra) e o novísimo Damián López (Touro).
Hoxe despútanse a categoría cadete na que contamos coa representación vilalbesa de Ramón Monasterio (menos de 76 kg grecorromana) e o campionato de España universitario no que destacan os vilalbeses Jose Luís Puentes e Marcos Miragaya que buscan revalidar o seu título.
Mañá tentaremos actualizar todos os resultados e subir algunhas instantáneas, mentras tanto boa sorte a todos.
VER MÁIS FOTOS

CUBA E PUENTES REMATAN O DAN KOLOV CON BOAS SENSACIÓNS PERO NON SUBEN AO PODIO

Hoxe tivo lugar o prestixioso Torneo Internacional Dan Kolov na capital búlgara, onde os vilalbeses Cuba e Puentes tomaron parte en representación da selección española.
A pesares de non subiren ao podio os vilalbeses tiveron unha moi boa actuación ante algúns dos mellores loitadores de Europa.
Jose Luís Puentes en menos de 84 kg non puido pasar da primeira rolda ao caer ante o representante francés por 2-0 e 3-0 rematando deste xeito a súa participación no torneo búlgaro.
Cuba pola súa banda pasou a primeira rolda tras vencer ao representante brasileiro por 1-0 e 1-0. No segundo enfrontamento caeu ante o búlgaro Kumchev por un axusado 6-4 e 4-3, pero a chegada do búlgaro  á final deu a Cuba a oportunidade de repescar polo bronce ante o loitador de Armenia, pero de novo o noso deportista non foi quén de superar ao medallista europeo caendo nun axustado enfrontamento.
Os quintos postos de Cuba e o balear Sánchez en menos de 55 kg foron os mellores resultados do equipo español masculino que regresa a casa para desputar o campionato de España que se celebrará o próximo fin de semena na localidade murciana de San Javier.

CONCENTRACIÓN INTERNACIONAL DE SOFIA (BULGARIA)

Os vilalbeses Puentes e Cuba continúan a adestrar co equipo búlgaro que permanecerá concentrado ata a fin de semana cando se celebre o prestixioso Torneo Internacional Dan Kolov. Os vilalbeses, xunto co resto do equipo español, están a traballar en moi boas condicións en Sofia co obxectivo posto nos clasificatorios para os Xogos Olímpicos que comezarán en Abril, pero antes terán que pasar a previa do Campionato de España Absoluto de Febreiro no que se xogan a súa presenza no equipo preolímpico español.

Os nosos deportistas comunicáronnos as magníficas condicións coas que contan o equipo búlgaro para a súa preparación, cunhas inmellorables instalacións e o gran número de deportistas nos adestramentos valoran moi positivamente a súa experiencia en Bulgaria e esperan demostralo a próxima fin de semana no prestixioso Dan Kolov. VER MÁIS FOTOS

Jose Cuba con Serafin Varsakov (Campión Mundial e 3 veces campión de Europa)

OS VILALBESES JOSE LUIS PUENTES E JOSE CUBA ESTARÁN NO DAN KOLOV DE BULGARIA

José Cuba e Jose Luís Puentes partiron hoxe pola mañá hacia terras búlgaras para participar no prestixioso torneo internacional de Dan Kolov que terá lugar en Sofia do 3 ao 5 de Febreiro. Esta será a primeira cita internacional do ano, e os vilalbeses permanecerán concentrados en Bulgaria adestrando co equipo nacional búlgaro que busca a clasificación dos seus deportistas nun dos torneos europeos máis duros.
Esta actividade é moi importante para os nosos vilalbeses de cara a preparar o próximo campionato de España que terá lugar en Murcia o 9 de Febreiro, cita clave para estar no equipo preolímpico. Sen embargo a presenza en Bulgaria dos vilalbeses non puido ser confirmada ata o derradeiro intre debido a incertidume en canto ao financiamento do club para esta tempada.A notificación por parte da Área de Cultura e Deportes da Deputación de Lugo da renovación do convenio anual para os gastos da tempada permítenos afrontar esta e outras citas que buscan a clasificación dos nosos deportistas para os próximos Xogos Olímpicos.

CAMPIONATO GALEGO SENIOR E CADETE DE LOITAS OLÍMPICAS

Este sábado celebrouse en Pontevedra o campionato galego de loitas olímpicas das categorías Senior e Cadete. Outro ano máis Vilalba acudiu á cita cun equipo reducido debido ás baixas de última hora, o que non nos privou de subir ao podio tanto en Libre Olímpica como na categoría de Grecorromana. Isto foi posible grazas a que todos os nosos deportistas acadaron medallas nas súas respectivas categorías.
Na categoría Senior trouxemos os ouros de José Cuba e Jose Luís Puentes que gañaron con moita superioridade nas categorías de 120 e 96 kg respectivamente. Ambos loitadores cumpriron coas espectativas pois son os principais loitadores galegos para entrar no próximos preolímpicos.
Tamén na categoría de 120 kg temos que destacar a Francisco Monasterio que acadou a prata tanto en Libre Olímpica como en Grecorromana perdendo somentes co seu compañeiro de club, sen dúbida un dos novos deportistas a ter en conta de cara ás próximas citas Júnior.
En menos de 84 kg contamos coa representación de Pablo Chao que tras varios enfrontamentos puido acadar sendos bronces en Libre Olímpica e Grecorromana. Outro bronce que veu para Vilalba foi o de José Francisco Bermúdez en menos de 74 kg que fixo un gran esforzo para estar en Pontevedra e non deixar aínda máis mermado ao equipo vilalbés.
En cadate queremos facer unha mención especial a Ramón Monasterio que pertencendo á categoría escolar foi quen de acadar a prata en Libre Olímpica e o ouro en Grecorromana en menos de 76 kg.
Varios dos nosos deportistas serán convocados pola seleción galega para representar a Galicia nos campionatos de España que terán lugar en Murcia o próximo 11 de Febreiro.
VER FOTOS