XORNADAS DE TECNIFICACIÓN DE VILA DE CRUCES

O pasado fin de semana varios deportistas da provincia desprazáronse a Vila de Cruces para participar nas Xornadas de Tecnificación Deportiva dirixidas e organizadas polos técnicos do Club Keltoi. O crucense e selecionador galego de loita grecorromana Rubén Méndez foi o xefe de tapiz e tivo baixo a súa tutela a preto dos 50 mellores loitadores do noso país.
A expedición lucense estivo composta por 10 loitadores do Vilalba, 7 do Rábade e 3 do Lugo, e destacou a presenza de varios loitadores que posúen na actualidade o título de campións de España nas súas respectivas categorías acompañados doutros deportistas que tamén subiron ao podio nas súas citas estatais. Entre eles destacamos:

• Carmen Salgado (Club Pontevedra), campiona de España cadete e escolar en loita feminina menos de 52 kg.
• Lydia Pérez (Club Pontevedra), campiona de España cadete e júnior en loita feminina menos de 60 kg).
• Noelia Lalín (Club Keltoi), campiona de España Senior en loita feminina en menos de 75 kg.
• Carlos Yobanni García (Club Vilalba), campión de España escolar e cadete en menos de 43kg.
• Roberto Díaz (Club Vilalba), campión de España cadete en menos de 47 kg.
• Nicolás López (Club Lugo), campión de España júnior en loita grecorromana menos de 120 kg.

Da man de Rubén Méndez os deportistas tomaron contacto con algunhas variantes técnicas sobre as que traballar ao longo desta tempada que agora comeza.

A próxima cita para estos deportistas serán as Xornadas Internacionais de Loitas Olímpicas que terán lugar en Vilalba os próximos 24 e 25 de Outubro e que este ano contarán co seleccionador italiano Michele Liuzzi.