VILALBA CAMPIONA DE GALICIA U13

 Hoxe celebráronse os Campionatos Galegos das categorías U13 e U17 no Pazo Provincial dos Deportes de Lugo nos que o noso club alzouse co primeiro posto por equipos na categoría U13 ao acadar 3 ouros e 3 bronces en loita feminina e 2 ouros e 1 bronce loita masculina.

Os ouros en loita feminina os acadaron Alejandra Valle en menos de 45 kg, África Montenegro en menos de 60 kg e Jimena García en menos de 65 kg. Os bronces foron para Noela González en menos de 60 kg e Noelia Vilasuso en menos de 65 kg.

En loita femina tamén participaron Lara Fernández en menos de 40 kg e Carmen Paredes en menos de 65 kg.

Os ouros en loita masculina foron para Héctor Somoza en menos de 50 kg e Enrique Seoane en menos de 65 kg mentres que Omar Guerreiro fíxose co bronce en menos de 35 kg.

En maculino U13 tamén participaron Lucas García e Marco Gaute en menos de 40 kg, Antón González e Xavi Yañez en menos de 45 kg.

Bruno Pintos que loitou polo Lugo acadou o bronce en menos de 45 kg.

Todos os deportistas tiveron un gran desempeño tendo en conta que era a primeira competición dos U13 co regulamento oficial, pero os resultados femininos teñen un sabor especial por seren os primerios podios en loita feminina na historia do noso club.

Na categoría U17 tivemos a representación de Kevin Cuba que domiñou a categoría facéndose co ouro en menos de 92 kg. 

As próximas citas, xa no mes marzo, serán os campionatos de España das categorías cadete e júnior nas que participará Kevin así como o inicio das Xornadas de Deporte Base nas que presentaremos un equipo mixto de nenas e nenos.

KEVIN CUBA 3º NO CAMPIONATO GALEGO JÚNIOR

 Os noso club participou esta fin de semana nos Campionatos Galegos de loitas olímpicas da categoría júnior que tiveron lugar no Pavillón do CGTD de Pontevedra. Os deportistas que nos representaron foron Kevín Cuba en menos de 125 kg e Xiao Seoane en menos de 65 kg.

Kevin acadou o bronce mentres que Xiao tivo que conformarse cun 5º posto tras gañar un enfrontamento e perder os dous seguintes.

A próxima competición será o Galego U17 no que Kevin volverá a competir na súa catogoría de idade e no seu peso 92 kg.

Xiao seguirá adestrando para coller experiencia nos próximos torneos de clubs aos que podamos asistir.

I MEMORIAL ALEXANDER KATCHELAEV

 

Este sábado acudimos á esperada cita na honra ao que foi a figura máis importante da loita galega nas últimas décadas. 

O noso club, como non podía ser doutro xeito, estivo presente con algúns dos nosos deportistas. Kevin Cuba acadou o ouro en cadete menos de 92 kg, mentres que Ramón Monasterio tamén subiu ao máis alto do podio ao domiñar a categoría sénior en menos de 97 kg. Para Ramón a competición supuxo retomar a competición despois de varias tempadas de parón.

Á cita tamén acudiu Jairo Mosteiro que se estreaba competindo en cadete menos de 60 kg e que non puido pasar da primeira rolda.

Alexander Katchelaev foi seleccionador da URSS na época en que este equipo consolidouse como a primeira potencia mundial en loita. Ademais de ser adestrador de varios campións olímpicos e mundiais foi xefe do equipo da URSS traballando con varios dos técnicos que hoxe domiñan a loita no planeta. Chegou a Galicia no ano 1991 para facerse cargo do equipo de loita do CGTD de Pontevedra e despois de case 40 anos de traballo foi o formador de moitos dos que nos puxemos baixo a súa batuta sendo aínda nenos. Sasha, como lle chamábamos, abriunos portas en lugares que naquela época semellaban lonxanos para occidente  e percorrimos parte do Mundo adestrando cos mellores loitadores do momento.

Para o noso club esta cita será unha data importante no calendario como mostra de respeto á persoa que tanto nos aportou.

KEVIN CUBA MELLOR LOITADOR DA PROVINCIA NOS PREMIOS DO DEPORTE DE EL PROGRESO

O noso deportista Kevin Cuba acada o premio ao mellor deportista de loita da provincia nos Premios ao Deporte Lucense organizado polo Progreso de Lugo e e cuxa ceremonia tivo lugar o 28 de setembro no Gran Hotel da capital da provincia.

Kevin foi recoñecido polo seu título de Campión de España Cadete así como os ouros nos galegos cadete e júnior e outras citas internacionais.
 

CUBA PERDE EN PRIMEIRA ROLDA NO MUNDIAL 2023

 

O Vilalbés José Cuba perdeu o primeiro combate ante o exipcio Kamal Gouda no Campionato do Mundo Sénior que se está a celebrar en Belgrado.

Esta era a primeira proba clasificatoria para os Xogos OLímpicos de París 2024 e as 5 prazas que se xogaban vendéronse moi caras estando todas reservadas aos loitadores das principais potencias mundiais deste deporte.

O noso deportista terá novas oportunidades nos torneos clasificatorios que comezarán no 2024.

Outro dos deportistas que periódicamente se prepara en Vilalba tamén tentou a clasificación neste Mundial. Trátase de Catriel Pehuén, loitador de Arxentina que busca clasificar para os xogos olímpicos ao primeiro peso pesado do país americano. Catriel tamén terá que esperar aos torneos clasificatorios ao perder en Belgrado ante o estadounidense Mark Parris.